Mae hwn yn brosiect newydd cyffrous sydd wedi’i rangyllido gan y Gronfa Datblygu Cynaliadwy a reolir gan Barc Cenedlaethol Arfordir Penfro.

Bydd Gorsaf Bŵer y Bobl (GBB) yn brosiect tair blynedd er mwyn sefydlu Cwmnïau Cyflenwi Ynni Cymunedol (CCYC) a gosod technoleg ynni adnewyddadwy cymunedol mewn pedair cymuned o fewn Parc Cenedlaethol Arfordir Penfro. I lwyddo yn hyn o beth bydd y prosiect yn clustnodi cymunedau penodol ac yna’n gweithio gyda grwpiau cymunedol i annog a hwyluso eu trawsnewid tuag at ddyfodol mwy cynaliadwy, gan sicrhau y byddan nhw wedi’u paratoi ar gyfer effaith newid hinsawdd ac anawsterau cyflenwi ynni yn y dyfodol.

Bydd y trawsnewid hwn, er yn unigryw i anghenion unigol pob cymuned fydd yn cymryd rhan, yn cadw at thema gyffredin ymhob un o’r ardaloedd fydd yn elwa o’r rhaglen arfaethedig.

Bydd agwedd gynhwysol ac ymarferol Gorsaf Bŵer y Bobl yn cynnwys y canlynol o fewn pob cymuned benodol:

Gweithredu gosodiadau ynni adnewyddadwy cymunedol. Dyma fydd prif amcan GBB; gosodiad ymarferol a phriodol o ran maint a fydd yn darparu buddiant uniongyrchol i’r cymunedau fydd yn cymryd rhan. Wrth gyflenwi’r cam sylfaenol hwn bydd y prosiect hefyd maes o law yn darparu:

a. Datrysiadau: asesiad ynni adnewyddadwy ar draws y gymuned a gweithredu
    i. Effeithlonrwydd ynni: lleihau’r galw am ynni yn ei darddle trwy gymorth a chyngor ar ynysu a theclynnau effeithiol
    ii. Astudiaeth ddichonolrwydd: darparu arbenigedd a chymorth grant ar gyfer astudio mesurau adnewyddadwy priodol - daw cymorth grant o ganlyniad i sicrhau arian wrth gyrff cyllido eraill megis Cronfa Loteri Fawr, Llywodraeth Cynulliad Cymru, Awdurdodau Lleol a chwmnïau gwasanaethau cyhoeddus.
    iii. Rheolaeth gymunedol: cynorthwyo cymunedau i sefydlu eu Cwmnïau Cyflenwi Ynni (CCY) eu hunain

b. Meincnodi: creu ôl-troed ecolegol i’r gymuned (dŵr, carbon ac ynni) gan ddefnyddio REAP Petite o’r SIE, neu feddalwedd modelu priodol arall
    i. Mesur: defnyddio canllawiau cost cyfredol a gosod gwybodaeth ar fasdata ar-lein os yn bosib
    ii. Cwblhau’r darlun: monitro’r adnewyddiadau sydd eisoes wedi’u gosod
    iii. Sefydlu blogiau er mwyn trafod arbed ynni, ac ati
    iv. Darparu hyfforddiant sylfaenol ynghylch ynni ac effeithlonrwydd ynni yn ogystal â chost cyfarpar cyfredol

c. Codi ymwybyddiaeth ac addysg: canolbwyntio ar sgyrsiau cymunedol, digwyddiadau, achlysuron
    i. Nodi problemau a datrysiadau: dadleuon cyhoeddus a seminarau
    ii. Sgyrsiau: siaradwyr allanol a siaradwyr CEGC
 
Mae gan y rhaglen ei gwefan ei hun lle fyddwn yn cofnodi cynnydd ac yn cyflwyno llawer o offer newydd i gynorthwyo cymunedau yng Nghymru i fod yn rhan o Orsaf Bŵer y Bobl .